საქმიანობის სფერო

საინფორმაციო ტექნოლოგიები, ინტერნეტი, კავშირგაბმულობა

საქმიანობის სახე

ტექსტური ინფორმაციის ორგანიზება და გაანალიზება, გამოთვლების გაკეთება

მოკლე აღწერილობა

SEO-ოპტიმიზატორი (SEO-ს სპეციალისტი) პასუხისმგებელია საძიებო სისტემაში ვებგვერდის პოპულარიზაციაზე. დარგის სპეციალისტი მართავს ვებგვერდის გარე და შიდა პარამეტრებს ისე, რომ საძიებო სისტემაში (Google, Yahoo და ა.შ. ) კონკრეტული ვებგვერდი იძებნებოდეს პირველ სტრიქონებში, მომხმარებლის გარკვეული (ყველაზე აქტუალური) მოთხოვნების ძიებისას. SEO- ოპტიმიზაცია (ინგლ; search engine optimization) აუცილებელია კონკრეტულ საიტზე მომხმარებელთა მაქსიმალური რაოდენობის მოზიდვისთვის და შესაბამისად გაიზრდება მოგება პროდუქციის თუ მომსახურების გაყიდვიდან ან/და რეკლამებიდან .

საძიებო სისტემა – ეს არის მომხმარებლისთვის ერთ-ერთი ძირითადი საშუალება ინტერენეტში საჭირო ინფორმაციის მოსაძიებლად. მაგ: იმისათვის, რომ შეიძინოს ჩაიდანი, მომხმარებელი საძიებო სისტემაში წერს „ჩაიდნის შეძენა“ ან უბრალოდ “ჩაიდანი” და ამოწმებს პირველ გვერდზე ჩამოთვლილ რამდენიმე საიტს, რომელსაც საძიებო სისტემა აჩვენებს. ნაკლებად სავარაუდოა, რომ მომხმარებელი გადავა 21-ე ან 32-ე გვერდზე იმისათვის, რომ მოძებნოს მისთვის სასურველი ნივთი და თუ თქვენი კომპანიის საიტი განლაგებულია საძიებო სისტემის პირველ 10  ჩამონათვალში, ალბათობა იმისა, რომ მომხმარებელი სწორედ თქვენგან შეიძენს ჩაიდანს, ძალიან მაღალია. იმისთვის რომ თქვენი კომპანიის ვებგვერდის მისამართი აღმოჩნდეს საძიებო სისტემის პირველ ათეულში, იგი საძიებო სისტემის  ‘ნდობას“ უნდა იწვევდეს, შეესაბამებოდეს ყველაზე სანდო და ხარისხიანი საიტების შერჩევის ალგორითმებს. სწორედ SEO-ოპტიმიზატორი მუშაობს ვებგვერდისა და საძიებო სისტემის პარამეტრებთან.

SEO-ოპტიმიზატორის საქმიანობას შეადგენს:

• კონკურენტების ანალიზი და მათი მდებარეობა ინტერნეტ სივრცეში
• სემანტიკური ბირთვის შემუშავება – საკვანძო სიტყვები და საძიებო მოთხოვნები, რომლის მიხედვითაც შეძლებს მომხმარებელი ვებგვერდის მოძიებას
• ვებგვერდის ყველა ტექნიკური შეცდომის გამოვლენა და გასწორება, რომელიც დაშვებული იყო ვებგვერდის ჩაშვებისას: არასწორი html-კოდი, გვერდების არასწორი კონფიგურაცია, meta-თაგების დუბლირება/არარსებობა, H1 სათაურების ან მთელი გვერდის არარსებობა, ვებგვერდის ჩატვირთვის სისწრაფე და ა.შ.
• საიტზე განსათავსებელი ხარისხიანი კონტენტის შექმნა ( ან სხვა რესურსებზე ვებგვერდის ბმულით). თითოეული სტატია უნდა იყოს არა მხოლოდ საინტერესო მომხამრებლისთვის, არამედ „გამჭვირვალე“ სტრუქტურის მქონე საძიებო სისტემისთვისაც.
• ვებგვერდის ნავიგაციის გაუმჯობესება.
• საიტზე გვერდების გახსნის სიჩქარის გაზრდა.
• ვებგვერდის რეგისტრაცია გარე რესურსებზე საძიებო სისტემების „ნდობის“ გაზრდის მიზნით.
• ანგარიშების მომზადება.
• ვებგვერდის მონიტორინგი.
• SEO-ს სფეროში შესაბამისი ინფორმაციის მონიტორინგი.

სად ვისწავლოთ

SEO სპეციალისტად მუშაობისთვის არ არის საჭირო უმაღლესი განათლება. დამსაქმებლები აფასებენ სამუშაო გამოცდილებას და პორტფელიოს, და არა დიპლომს. SEO– ის საფუძვლების დასაუფლებლად, შეგიძლიათ გაიაროთ მოკლე საგანმანათლებლო/სასერტიფიკატო კურსები ან ისწავლოთ დამოუკიდებლად წიგნების და სასწავლო ვიდეოების გამოყენებით. თუმცა, თუ თქვენ გსურთ SEO -ს მიმართულებით კარიერის დაგეგმვა ან საკუთარი ბიზნესის დაფუძნება ამ მიმართულებით, მიზანშეწონილია უმაღლესი განათლების მიღება ინფორმაციულ-ტექნოლოგიური (IT ), კომპიუეტრული ინჟნერიის ან მათემატიკური პროფილების მიმართულებით.

განათლების მიმართულება:

• მათემატიკა და მექანიკა
• კომპიუტერული და ინფორმაციული ტექნოლოგიები
• ინფორმატიკა
• საინფორმაციო უსაფრთხოება