ადვოკატი: როგორ დავეუფლოთ პროფესიას 

იურიდიული პროფესია მნიშვნელოვან ადგილს იკავებს ადამიანის ცხოვრების ყველა სფეროში. საკვალიფიკაციო გამოცდის გავლის შემდეგ ადვოკატს შეუძლია ადვოკატის ფუნქციების შესრულება.

რა არის სპეციალობის მახასიათებლები, მისი უპირატესობები და პერსპექტივები ქვევით მოგიყვებით.

მოკლე აღწერილობა

ადვოკატი (ლათ. Advocatus>advoco -ვიხმობ) -პირი, რომლის ვალდებულებაა იურიდიული დახმარება გაუწიოს მოქალაქეს, სახელმწიფო თუ საზოგადოებრივ ორგანიზაცია-დაწესებულებებს.

ადვოკატი გამოდის ბრალდებულის, განსასჯელის დამცველად და ასევე დაზარალებულის წარმომადგენლად დავის განხილვის დროს. ადვოკატის მოვალეობაა იურიდიული რჩევა-დარიგება მისცეს მოქალაქეებს და ორგანიზაცია-დაწესებულებებს, შეუდგინოს მათ განცხადებები, საჩივრები, საქმიანი ქაღალდები, განუმარტოს სამართლებლივი საკითხები და ა.შ. მას უფლება არ აქვს გაამხილოს იმ პირის საიდუმლო, რომელსაც იურიდიულ დახმარებას უწევს.

რა ფუნქციები ენიჭება ადვოკატს:

✔ მოქმედი კანონმდებლობის, სხვადასხვა სამართლებრივი აქტების დებულებების პრაქტიკაში გამოყენება

✔ იურიდიული კონსულტაცია, სერთიფიკატების რეგისტრაცია

✔ ადამიანების, იურიდიული პირების, სახელმწიფო დაწესებულებების უფლებების დაცვის დაგეგმვა

✔ დახმარება პრეტენზიების, საჩივრების, შუამდგომლობების, განხილვისა და სხვა სამართლებრივი დოკუმენტაციის მომზადებაში

✔ მოითხოვოს სხვადასხვა ორგანოსგან ინფორმაცია, კვლევები, მოსაზრებები, ჩვენებები კლიენტის საიმედო დაცვისთვის

✔ კლიენტისთვის ინფორმაციის მიწოდება მისი საქმის განხილვის ეტაპების და შედეგის შესახებ

ამასთან, ადვოკატი ყველაფერს აკეთებს იმისათვის, რომ გაამართლოს კლიენტი ან ამტკიცებს აქტის კვალიფიკაციისას შემამსუბუქებელი გარემოებების გამოყენების შესაძლებლობას. ადვოკატის საქმიანობა დაკავშირებულია საგამოძიებო მოქმედებების და სასამართლო წარმოებისას კლიენტის ინტერესების დაცვასთან.

რა თვისებები უნდა ჰქონდეს ადვოკატს

როგორ უნდა გახდე ადვოკატი? ამისთვის არ არის საკმარისი იურიდიული დიპლომი. საჭირო დროს სპეციალისტმა სწრაფად უნდა მოძებნოს გადაწყვეტილებები, რომლებიც განსაზღვრავს საქმის შედეგს. ამიტომ მას უნდა ჰქონდეს განვითარებული ინტელექტი, ორატორული შესაძლებლობები და სწრაფი რეაქცია. ახალი ცოდნისადმი ღიაობა, დიდი პასუხისმგებლობის გრძნობა, გარეგნობაზე ზრუნვა ასევე ადვოკატის მნიშვნელოვანი მახასიათებელია.

წარმატების მისაღწევად, ადამიანი კარგად უნდა იყოს გათვითცნობიერებული კანონმდებლობაში. სისხლის სამართლის საქმის სპეციალისტისგან საჭიროა სისხლის სამართლის კოდექსის ცოდნა, ადმინისტრაციული – ადმინისტრაციულ სამართალდარღვევათა კოდექსის, ასევე იმ კანონების, რომელთა დარღვევაც კლიენტს მიეწერება.

ადვოკატმა უნდა იცოდეს ყველა ცვლილება საკანონმდებლო რეგულაციებში, იცოდეს უზენაესი სასამართლოს, ადამიანის უფლებათა ევროპული სასამართლოს პოზიცია გარკვეულ სფეროებში.

სპეციალობა ასევე უწესებს ადვოკატს შემდეგ მოთხოვნებს:

✎კონფიდენციალური ინფორმაციის შენახვის უნარი

✎ ლოგიკური, ანალიტიკური აზროვნება

✎ თავშეკავება

ადვოკატი უნდა იყოს კარგი ფსიქოლოგი, შეძლოს  გასაღების პოვნა კლიენტთან ურთიერთობისთვის, მისგან გულწრფელობის და ნდობის მოპოვება. ამაზეა დამოკიდებული თანამშრომლობის შედეგი.

როგორ გავხდე ადვოკატი

იმისათვის რომ ადვოკატი გახდეთ საჭიროა იურიდიული კვალიფიკაცია, ბაკალავრის დიპლომი. იმისათვის რომ გახდეთ მოთხოვნადი ლიცენზირებული ადვოკატი, სავალდებულოა  ადვოკატთა საკვალიფიკაციო გამოცდის ჩაბარება. ირჩევთ სფეროს, გამოცდას აბარებთ ან სამოქალაქო სამართლის სპეციალიზაციით, ან სისხლის სამართლის ან საერთო სპეციალიზაციით.

კარიერული ზრდის შესაძლებლობები

სტაჟირების დასრულების შემდეგ ახალგაზრდა სპეციალისტი ხდება ადვოკატის ასისტენტი. ამ თანამდებობაზე ადამიანი იძენს ფასდაუდებელ ცოდნას და უნარებს, რაც მომავალში დიდ შემოსავალს მოუტანს. გარკვეული პერიოდის შემდეგ, იურისტს შეუძლია დაიწყოს თავისი პრაქტიკა, გახდეს იურიდიული ოფისის წევრი ან იმუშაოს საკონსულტაციო კომპანიაში. მსხვილ ორგანიზაციებში იურისტად დასაქმების შემდეგ, უფლებადამცველს შეუძლია საბოლოოდ „გაიზარდოს“ რიგითი სპეციალისტიდან განყოფილების ან კომპანიის  ხელმძღვანელამდე და მიიღოს მნიშვნელოვანი მენეჯერული გადაწყვეტილებები.

პროფესიის პერსპექტივები

ადვოკატის პროფესია პრესტიჟულია. მისი პოპულარობა უახლოეს მომავალში კიდევ უფრო მეტად გაიზრდება. იმისთვის, რომ იყოთ მოთხოვნადი ბაზარზე, თქვენ უნდა იყოთ პროფესიონალი. რიგითი მოქალაქეები და ორგანიზაციები სულ უფრო ხშირად მიმართავენ პროფესიონალ უფლებადამცველთა მომსახურებას, რომლებიც აწარმოებენ სამოქალაქო, ადმინისტრაციულ, სისხლის სამართლის და ოჯახურ საქმეებს.

ამ სპეციალობის მრავალი წარმომადგენელი მუშაობს დამოუკიდებლად და იღებს კარგ ანაზღაურებას. იმისთვის, რომ თავის პროფესიაში იყოს საუკეთესო, ადამიანს სჭირდება ცოდნის რეგულარული გაუმჯობესება. სასამართლო პროცესებში გამარჯვებები, კლიენტების დადებითი გამოხმაურება – ასე შეიძლება ნაბიჯ-ნაბიჯ გახდეთ მოთხოვნადი, ძალიან კარგად ანაზღაურებადი უფლებადამცველი.

განათლების მიმართულება:

სამართალმცოდნეობა

უმაღლესი სასწავლებლები: დიახ

პროფესიული სასწავლებლები: არა

საჭირო კომპეტენციები:

• კონტაქტების დამყარება: სხვა ადამიანთან საერთო ენის ადვილად პოვნის უნარი
• გავლენის მოხდენისა და დარწმუნების უნარი
• მოქნილობა: ცვლილებებთან ადვილად ადაპტაციის უნარი
• სისტემური აზროვნება
• სტრესმედეგობა: სიმშვიდის შენარჩუნებისა და გადაწყვეტილების მიღების უნარი რთულ და სტრესულ სიტუაციებში
• ანალიტიკური აზროვნება: მიზეზ -შედეგობრივი კავშირების იდენტიფიკაციის უნარი
• ინფორმაციასთან მუშაობა: საჭირო ინფორმაციის მოძიების, მოწოდებული მასალების გაგების უნარი