საქმიანობის სფერო

ფსიქოლოგია, პედაგოგიკა, სოციალური მუშაობა

საქმინობის სახე

ადამიანებთან კომუნიკაცია (დახმარება, მომსახურება, მხარდაჭერა)

მოკლე აღწერილობა

ფსიქოკონსულტანტის მთავარი ამოცანაა შექმნას პირობები იმისთვის, რომ მასთან კონსულტირებაზე მისული ადამიანის მდგომაროება შეიცვალოს  და მის ცხოვრებაში მოხდეს პოზიტიური ცვლილებები. ასეთ სპეციალისტს უნდა შეეძლოს კლიენტთან კომუნიკაციის პროცესში შექმნას ისეთი პირობები, რომლითაც კლიენტს შეეძლება მოიძიოს თავისი რესურსები, გამოავლინოს პოტენციალი და გადალახოს ნებისმიერი ცხოვრებისეული გამოწვევა.

ფსიქოკონსულტანტის  ძირითადი საქმიანობა კლიენტებთან ურთიერთობაა. თუმცა, ეს არც ისე მარტივია, როგორც ერთი შეხედვით შეიძლება ჩანდეს.  ფსიქოლოგის კომუნიკაცია კლიენტთან ძალიან განსხვავდება ჩვეულებრივი, ყოველდღიური ურთიერთობებისგან და ფსიქოლოგისა და კლინეტისთვის დამახასიათებელ, სპეციალური კომუნიკაციის უნარ-ჩვევებს სპეციალისტი იძენს გრძელვადიანი სწავლების და პრაქტიკის პროცესში.

მიუხედავად იმისა, თუ ვინ მოდის კონსულტაციაზე ფსიქოლოგთან, კონსულტანტი ეპყრობა მას პატივისცემით  და თანაგრძნობით. პროფესიონალი ფსიქოლოგი არასოდეს აძლევს თავს უფლებას შეაფასოს თავისი კლიენტი.

საუბრის მსვლელობისას ფსიქოლოგს სჭირდება აქტიური მოსმენა და ყურადღების კონცენტრირება კლიენტის ყოველ სიტყვასა და მოძრაობაზე, რადგან ყოველივე ამას შეუძლია დაეხმაროს ფსიქოკონსულტანტს გაიგოს პაციენტის მდგომარეობა, განცდები. მას სჭირდება იმ უზარმაზარი ინფორმაციის ანალიზი, რომელსაც პაციენტი უზიარებს მას. გარდა ამისა, მან ერთდროულად უნდა განიხილოს ყოველი სიტყვა, ყველა დასმული შეკითხვა. მთელი კონსულტაციის განმავლობაში ფსიქოლოგი უნდა იყოს გულწრფელი და ბუნებრივი, მაგრამ ამავე დროს აკონტროლოს ყველა თავისი ემოცია.

ფსიქოკონსულტანტს არ შეუძლია რჩევა მისცეს თავის კლიენტს პირადი გამოცდილებიდან ან სხვების გამოცდილებიდან გამომდინარე. მან გულდასმით უნდა გააანალიზოს თავისი კლიენტის უნიკალური სიტუაცია და შექმნას ისეთი პირობები, რომლითაც ადამიანს შეუძლია გადაწყვეტილების მიღება საკუთარ რესურსებზე და გამოცდილებაზე დაყრდნობით .

განათლების მიმართულება:

ფსიქოლოგია

უმაღლესი სასწავლებლები: დიახ

პროფესიული სასწავლებლები: არა

სად დავსაქმდები:

• ფსიქოლოგიური ცენტრები
• სამედიცინო დაწესებულებები (კლინიკები, საავადმყოფოები)
• კერძო პრაქტიკა
• საგანმანათლებლო დაწესებულებები

საჭირო კომპეტენციები:

• კონტაქტების დამყარება: სხვა ადამიანთან საერთო ენის ადვილად პოვნის უნარი
• მომხმარებელზე ფოკუსირება: ყურადღებით მოსმენა და თანაგრძნობა
• სისტემური აზროვნება: სიტუაციის სხვადასხვა კუთხით განხილვისა და ყველა შესაძლო პირობის გათვალისწინების სურვილი
• ანალიტიკური აზროვნება: მიზეზ-შედეგობრივი კავშირების იდენტიფიცირების უნარი